Xüsusi fiziki və fiziki-kimyəvi xassələrə malik olan mürəkkəb tərkibli qeyri-üzvi yeni materialların alınmasının qanunauyğunluqları müəyyən edilmişdir. Elektronika üçün əhəmiyyətli olan yeni çoxkomponentli materialların yaradılması üsulları nəzəri və təcrübi yollar ilə işlənmişdir və uyğun sistemlərdə faza tarazlığının topoloji qanunauyğunluqları müəyyən edilmişdir. Yaradılan mürəkkəb tərkibli qeyri-üzvi materialların (mono- və polikristallar, şüşəvari nümunələr, nazik təbəqələr, nanostrukturlar) fiziki, fiziki-kimyəvi və termodinamiki xassələri tədqiq edilmiş və modelləşdirmə metodu ilə əsas parametrləri hesablanmışdır. Alınan nəticələr sorğu kitablarına və Beynəlxalq Elmi Məlumat Banklarına daxil edilmişdir. Hesablama və modelləşdirmə metodları ilə çoxkomponentli qeyri-üzvi fazalar, neft mühütündə və qazkondensatın iştirakı ilə olan əhəmiyyətli heterogen sistemlərdə müxtəlif termokinetik şəraitdə gedən bəzi fiziki-kimyəvi və texnoloji proseslərin termodinamikası, kinetikası, mexanizmi və ümumi qanunauyğunluqları müəyyən edilmişdir. Qaz-su sistemində qeyri-tarazlıqda və kritik hal yaxınlığında olan bəzi texnoloji proseslərin kimyəvi və fiziki kinetikası, termodinamikası tədqiq edilmiş, bir sıra effektiv texnoloji proseslərin yaradılması metodları inkişaf etdirilmişdir. Təbii qaz-su sistemində qazhidratların yaranması səbəbləri müəyyən edilmiş, bu sistemdə faza tarazlığı tədqiq edilmiş və modelləşdirilmişdir.

Pambıq bitkisi əsasında, neft təsərrüfatı üçün əhəmiyyətli olan, korroziya ingibitorları hazırlanmış və praktikada sınaqdan keçirilmişdir. Öptimal tərkibli ingibitorların müxtəlif şəraitdə xassələri tədqiq edilmiş və onların təsiri mexanizmləri araşdırılmışdır.